આપણી જ્ઞાતિ ગામડાઓમાં વસતી હોઈ અને ધીરધાર સૌનો વ્યવસાય હોઈ જ્ઞાતિમાં કેળવણીનું પ્રમાણ ખૂબ ઓછું હતું. જ્ઞાતિના યુવાનો અને બહેનો દિકરીઓ શિક્ષિત બને એની આવશ્યકતા વિચારી સૌનું ભવિષ્ય ઉજ્જવળ બનાવવા સ્વ. શેઠ શ્રી વિઠ્ઠલદાસે સં.1910 માં પંચમાં ઠરાવ કરી રૂ. 150/- ની રકમ અલગ ફાળવી ફરજીયાત રીતે કેળવણી માટે સ્કોલરશીપ સહાય આપવાનું શરૂ કર્યું અને જાતે જઈ દરેકને સહાય પહોંચાડી શૈક્ષણિક પ્રવૃત્તિ ચાલુ રાખી, એટલું જ નહી બહેન – દિકરીઓ શિક્ષિત બને તે માટે કન્યાફંડ ઉગરાવી છોકરીઓને પણ શૈક્ષણિક સહાય આપવાનું શરૂ કર્યું.

ખડાયતા જ્ઞાતિ ગામડાઓમાં વસતી હતી અને ત્યાં સ્કુલો ન હોવાથી દશા – વિશા ખડાયતા જ્ઞાતિના શેઠીયાઓ અને આગેવાનો મળી સ્વ. શેઠશ્રી વિઠ્ઠલદાસે સંવત 1917 માં મોડાસામાં જગ્યા ભાડે રાખી ખડાયતા છાત્રાલય શરૂ કર્યું. સમય જતાં સૌનો સહકાર લઈ મોડાસામાં જમીન ખરીદી ખડાયતા છાત્રાલયનું બાંધકામ કરાવ્યું જે પૈકી બ્લોક આપણા એકડાનો છે અને છાત્રાલય તરીકે વહીવટ કરે છે.

તા. 15/12/1932 માં સ્વ. શેઠશ્રી વિઠ્ઠલદાસે જ્ઞાતિપંચમાં ઠરાવ કરી "શ્રી મોડાસા એકડા દશા ખડાયતા કેળવણી મંડળ" ની સ્થાપના કરી જ્ઞાતિમાં વિધિસર કેળવણીનો સેવા યજ્ઞ શરૂ કર્યો. ધાર્મિક સંસ્કારો ધરાવતા સ્વ. શેઠશ્રી વિઠ્ઠલદાસ શીવલાલ શાહે સને 1947-48 માં નિવૃત્તિ લેતાં તેમના જયેષ્ઠ પુત્ર સ્વ. શેઠશ્રી નટવરલાલ વિઠ્ઠલદાસ શાહે શીકા કંપામાં મળેલ જ્ઞાતિ પંચની મિટીંગમાં જ્ઞાતિપંચના શેઠનું સુકાન સંભાળી, પંચનો વહીવટ સંભાળવાનું શરૂ કર્યું. તેમના ખાસ આગ્રહથી 1950 માં આપણું કેળવણી મંડળ બોમ્બે પબ્લીક ટ્રસ્ટ એક્ટ 1950 હેઠળ રજીસ્ટ્રર કરાવ્યું. આઝાદીના વર્ષોમાં જ્ઞાતિપંચનો વહીવટ સંભાળનાર સ્વ. શેઠશ્રી નટવરભાઈએ સમાધાનવૃત્તિ, ઉદારતા ને બાંધછોડ અભિગમ અપનાવી વર્ષો સુધી જ્ઞાતિપંચના નેજા હેઠળ આપણા સમાજને સંગઠીત રાખી, જ્ઞાતિમાં સંયુક્ત નેતાગીરી ઉભી કરી સેવાનો સ્ત્રોત વહાવ્યો જેના આપણે સૌ સાક્ષી છીએ. જ્ઞાતિનું ભવિષ્ય ઉજ્જવળ બનાવવા ક્રમેક્રમે રચનાત્મક પ્રવૃત્તિઓ શરૂ કરવા નવી સંસ્થાઓ સ્થાપી જ્ઞાતિમાં શરૂ થયેલ સેવાયજ્ઞને વધુને વધુ પ્રજ્વલિત બનાવ્યા. જેના ફળ આજે પણ મળી રહ્યા છે. 1964 થી શેઠશ્રી નટવરભાઈના જયેષ્ઠ પુત્ર શ્રી પ્રવિણભાઈ વકીલે જ્ઞાતિપંચની મીટીંગોમાં આવવાનું શરૂ કરી પંચની કાર્યવાહી સંભાળી શેઠશ્રી સાથે રહી પંચનું સંચાલન કરી સૌનો પ્રેમ અને વિશ્વાસ સંપાદન કર્યો.

30 જાન્યુઆરી 1971 ના રોજ શેઠ શ્રી વિઠ્ઠલદાસ શીવલાલ શાહનું દુઃખદ અવસાન થતા તેમની સેવાઓને ધ્યાનમાં રાખી જ્ઞાતિ આગેવાનોએ આર્થિક રીતે મુશ્કેલી અનુભવતા જ્ઞાતિજનોને સહાયરૂપ થવા "શ્રી મોડાસા એકડા દશા ખડાયતા મધ્યમવર્ગ સહાય મંડળ" ની સ્થાપના કરી નવી પ્રવૃત્તિ શરૂ કરી. આ પ્રવૃત્તિને વેગ મળે તે માટે વિશાળ ભંડોળની આવશ્યકતા હોઈ 1988 માં આ સંસ્થા બંધ કરી 80 જીનો લાભ લેવા નવી સંસ્થા " શેઠ વિઠ્ઠલદાસ શીવલાલ શાહ મોડાસા એકડા દશા ખડાયતા ચેરીટેબલ સોસાયટી" ની સ્થાપના કરી જેનો રજતજયંતિ મહોત્સવ 2014 માં શ્રી કોટીયર્ડ મંદિર મહુડી ખાતે ઉજવ્યો.

અને 1979 માં સંજોગોને ધ્યાનમાં લઈ "શ્રી મોડાસા એકડા દશા ખડાયતા વસ્તીપત્રક સમિતિ" ની સ્થાપના કરી તેમાં જ્ઞાતિનું વસ્તીપત્રક પાંચ વર્ષે પ્રગટ કરી તેમજ પરિચય સંમેલન યોજી જ્ઞાતિના યુવક-યુવતીઓનાં સગપણની મુશ્કેલીઓ સહાયભૂત થવું તેવું નક્કી થયું. આજસુધીમાં અનુક્રમે આઠ વસ્તીપત્રક ગ્રંથ 1974, 1981, 1987, 1994, 2000, 2006, 2012 અને 2022 માં બહાર પાડેલ છે. ટેલીફોન ડાયરી અનુક્રમે પાંચ 2000, 2003, 2006, 2010 અને 2022 માં બહાર પાડેલ છે. આ ઉપરાંત આજસુધીમાં સમુહલગ્ન ફકત 2 અને પરિચય સંમેલન કુલ 11 થયેલ છે..